||Sundarakanda ||
|| Sarga 15||( Slokas in Kannada )
Sloka Text in Telugu , Kannada, Gujarati, Devanagari, English
हरिः ओम्
ಸುಂದರಕಾಂಡ.
ಅಥ ಪಂಚದಶಸ್ಸರ್ಗಃ
ಸವೀಕ್ಷಮಾಣ ಸ್ತತ್ರಸ್ಥೋ ಮಾರ್ಗಮಾಣಶ್ಚ ಮೈಥಿಲೀಮ್|
ಅವೇಕ್ಷಮಾಣಶ್ಚ ಮಹೀಂ ಸರ್ವಾಂ ತಾಮನ್ವವೇಕ್ಷತ||1||
ಸಂತಾನಕಲತಾಭಿಶ್ಚ ಪಾದಪೈರುಪಶೋಭಿತಾಮ್ |
ದಿವ್ಯಗನ್ಧರಸೋಪೇತಾಂ ಸರ್ವತಃ ಸಮಲಂಕೃತಾಮ್||2|
ತಾಂ ಸ ನನ್ದನಸಂಕಾಶಾಂ ಮೃಗಪಕ್ಷಿಭಿ ರಾವೃತಾಂ|
ಹರ್ಮ್ಯಪ್ರಾಸಾದ ಸಂಭಾಧಾಂ ಕೋಕಿಲಾಕುಲನಿಸ್ವನಾಮ್|| 3||
ಕಾಞ್ಚನೋತ್ಪಲಪದ್ಮಾಭಿಃ ವಾಪೀಭಿರುಪಶೋಭಿತಾಮ್|
ಬಹ್ವಾಸನಕುಥೋಪೇತಾಂ ಬಹುಭೂಮಿ ಗೃಹಾಯುತಾಮ್||4||
ಸರ್ವರ್ತುಕುಸುಮೈ ರಮ್ಯಾಂ ಫಲವದ್ಭಿಶ್ಚ ಪಾದಪೈಃ|
ಪುಷ್ಪಿತಾನಾಂ ಅಶೋಕಾನಾಂ ಶ್ರಿಯಾ ಸೂರ್ಯೋದಯಪ್ರಭಾಮ್||5||
ಪ್ರದೀಪ್ತಮಿವ ತತ್ರಸ್ಥೋ ಮಾರುತಿಃ ಸಮುದೈಕ್ಷತ|
ನಿಷ್ಪತ್ರಶಾಖಾಂ ವಿಹಗೈಃ ಕ್ರಿಯಮಾನಾ ಮಿವಾಸಕೃತ್||6||
ವಿನಿಷ್ಪತದ್ಭಿಃ ಶತಶಃ ಚಿತ್ರೈಃ ಪುಷ್ಪಾವತಂಸಕೈಃ|
ಅಮೂಲಪುಷ್ಪನಿಚಿತೈಃ ಅಶೋಕೈಃ ಶೋಕನಾಶನೈಃ||7||
ಪುಷ್ಪಭಾರಾತಿಭಾರೈಶ್ಚ ಸ್ಪೃಶದ್ಭಿರಿವ ಮೇದಿನೀಂ|
ಕರ್ಣಿಕಾರೈಃ ಕುಶುಮಿತೈಃ ಕಿಂಶುಕೈಶ್ಚ ಸುಪುಷ್ಪಿತೈಃ||8||
ಸ ದೇಶಃ ಪ್ರಭಯಾ ತೇಷಾಂ ಪ್ರದೀಪ್ತ ಇವ ಪರ್ವತಃ|
ಪುನ್ನಗಾ ಸಪ್ತವರ್ಣಾಶ್ಚ ಚಮ್ಪಕೋದ್ದಾಲಕಾಸ್ತಥಾ||9||
ವಿವೃದ್ಧಮೂಲಾ ಬಹವಃ ಶೋಭನ್ತೇ ಸ್ಮ ಸುಪುಷ್ಪಿತಾಃ|
ಶಾತಕುಮ್ಭನಿಭಾಃ ಕೇಚಿತ್ ಕೇಚಿದಗ್ನಿ ಶಿಖೋಪಮಾಃ||10||
ನೀಲಾಙ್ಜನನಿಭಾಃ ಕೇಚಿತ್ ತತ್ರಾಽಶೋಕಾ ಸಹಸ್ರಶಃ|
ನನ್ದನಂ ವಿವಿಧೋದ್ಯಾನಂ ಚಿತ್ರಂ ಚೈತ್ರರಥಂ ಯಥಾ||11||
ಅತಿವೃತ್ತ ಮಿವಾಚಿನ್ತ್ಯಂ ದಿವ್ಯಂ ರಮ್ಯಂ ಶ್ರಿಯಾ ವೃತಂ|
ದ್ವಿತೀಯ ಮಿವ ಚಾಕಾಶಂ ಪುಷ್ಪಜ್ಯೋತಿ ರ್ಗಣಾಯುತಮ್ ||12||
ಪುಷ್ಪರತ್ನಶತೈ ಶ್ಚಿತ್ರಂ ಪಞ್ಚಮಂ ಸಾಗರಂ ಯಥಾ |
ಸರ್ವರ್ತುಪುಷ್ಪೈರ್ನಿಚಿತಂ ಪಾದಪೈರ್ಮಧುಗನ್ದಿಭಿಃ||13||
ನಾನಾನಿನಾದೈರುದ್ಯಾನಂ ರಮ್ಯಂ ಮೃಗಗಣೈರ್ದ್ವಿಜೈಃ|
ಅನೇಕ ಗನ್ಧಪ್ರವಹಂ ಪುಣ್ಯಗನ್ಧಂ ಮನೋರಮಮ್||14||
ಶೈಲೇಂದ್ರಮಿವ ಗನ್ಧಾಢ್ಯಂ ದ್ವಿತೀಯಂ ಗನ್ಧಮಾದನಮ್|
ಅಶೋಕವನಿಕಾಯಾಂ ತು ತಸ್ಯಾಂ ವಾನರಪುಂಗವಃ ||15||
ಸದದರ್ಶಾ ವಿದೂರಸ್ಥಂ ಚೈತ್ಯಪ್ರಾಸಾದ ಮುಚ್ಛ್ರಿತಮ್|
ಮಧ್ಯೇ ಸ್ತಮ್ಭ ಸಹಸ್ರೇಣ ಸ್ಥಿತಂ ಕೈಲಾಸಪಾಣ್ಡುರಮ್||16||
ಪ್ರವಾಳಾಕೃತ ಸೋಪಾನಂ ತಪ್ತಕಾಞ್ಚನವೇದಿಕಂ|
ಮುಷ್ಣನ್ತಮಿವ ಚಕ್ಷೂಂಷಿ ದ್ಯೋತಮಾನಮಿವ ಶ್ರಿಯಾ||17||
ವಿಮಲಂ ಪ್ರಾಂಶುಭಾವತ್ವಾ ದುಲ್ಲಿಖನ್ತ ಮಿವಾಮ್ಬರಮ್|
ತತೋ ಮಲಿನ ಸಂವೀತಾಂ ರಾಕ್ಷಸೀಭಿಃ ಸಮಾವೃತಾಮ್||18||
ಉಪವಾಸಕೃಶಾಂ ದೀನಾಂ ನಿಶ್ಸ್ವಸನ್ತೀಂ ಪುನಃ ಪುನಃ|
ದದರ್ಶ ಶುಕ್ಲಪಕ್ಷಾದೌ ಚನ್ದ್ರರೇಖಾಮಿವಾಮಲಾಮ್||19||
ಮನ್ದಂ ಪ್ರಖ್ಯಾಯಮಾನೇನ ರೂಪೇಣ ರುಚಿರಪ್ರಭಾಂ|
ಪಿನದ್ಧಾಂ ಧೂಮಜಾಲೇನ ಶಿಖಾಮಿವ ವಿಭಾವಸೋಃ||20||
ಪೀತೇನೈಕೇನ ಸಂವೀತಾಂ ಕ್ಲಿಷ್ಟೇನೋತ್ತಮವಾಸಸಾ|
ಸಪಙ್ಕಾಂ ಅನಲಙ್ಕಾರಂ ವಿಪದ್ಮಾಮಿವ ಪದ್ಮಿನೀಮ್ ||21||
ವ್ರೀಡಿತಾಂ ದುಃಖಸಂತಪ್ತಾಂ ಪರಿಮ್ಲಾನಾಂ ತಪಸ್ವಿನೀಮ್|
ಗ್ರಹೇಣಾಙ್ಗಾರಕೇಣೇವ ಪೀಡಿತಾಮಿವ ರೋಹಿಣೀಮ್||22||
ಅಶ್ರುಪೂರ್ಣಮುಖೀಂ ದೀನಾಂ ಕೃಶಾಮನಶನೇನ ಚ|
ಶೋಕಧ್ಯಾನಪರಾಂ ದೀನಾಂ ನಿತ್ಯಂ ದುಃಖಪರಾಯಣಾಮ್||23||
ಪ್ರಿಯಂ ಜನಮಪಶ್ಯಂತೀಂ ಪಶ್ಯನ್ತೀಂ ರಾಕ್ಷಸೀಗಣಮ್|
ಸ್ವಗಣೇನ ಮೃಗೀಂ ಹೀನಾಂ ಶ್ವಗಣಾಭಿವೃತಾ ಮಿವ||24||
ನೀಲನಾಗಾಭಯಾವೇಣ್ಯಾ ಜಘನಂ ಗತ ಯೈಕಯಾ|
ನೀಲಯಾ ನೀರದಾಪಾಯೇ ವನರಾಜ್ಯಾ ಮಹೀಮಿವ||25||
ಸುಖಾರ್ಹಂ ದುಃಖಸಂತಪ್ತಾಂ ವ್ಯಸನಾನಾಂ ಅಕೋವಿದಾಮ್|
ತಾಂ ಸಮೀಕ್ಷ್ಯ ವಿಶಾಲಾಕ್ಷೀಂ ಅಧಿಕಂ ಮಲಿನಾಂ ಕೃಶಾಮ್ ||26||
ತರ್ಕಯಾಮಾಸ ಸೀತೇತಿ ಕಾರಣೈರುಪಪಾದಿಭಿಃ|
ಹ್ರಿಯಮಾಣಾ ತದಾ ತೇನ ರಕ್ಷಸಾ ಕಾಮರೂಪಿಣಾ||27||
ಯಥಾರೂಪಾಹಿ ದೃಷ್ಟಾ ವೈ ತಥಾ ರೂಪೇಯ ಮಙ್ಗನಾ|
ಪೂರ್ಣ ಚನ್ದ್ರಾನನಾಂ ಸುಭೄಂ ಚಾರುವೃತ್ತಪಯೋಧರಾಮ್||28||
ಕುರ್ವನ್ತೀಂ ಪ್ರಭಯಾ ದೇವೀಂ ಸರ್ವಾ ವಿತಿಮಿರಾ ದಿಶಃ|
ತಾಂ ನೀಲಕೇಶೀಂ ಬಿಮ್ಬೋಷ್ಟೀಂ ಸುಮಧ್ಯಾಮ್ ಸುಪ್ರತಿಷ್ಟಿತಾಮ್||29||
ಸೀತಾಂ ಪದ್ಮಪಲಾಶಾಕ್ಷೀಂ ಮನ್ಮಥಸ್ಯ ರತಿಂ ಯಥಾ|
ಇಷ್ಟಾಂ ಸರ್ವಸ್ಯ ಜಗತಃ ಪೂರ್ಣಚನ್ದ್ರ ಪ್ರಭಾಮಿವ ||30||
ಭೂಮೌ ಸುತನುಮಾಸೀನಾಂ ನಿಯತಾಮಿವ ತಾಪಸೀಂ |
ನಿಶ್ಸ್ವಾಸಬಹುಳಾಂ ಭೀರುಂ ಭುಜಗೇನ್ದ್ರ ವಧೂಮಿವ ||31||
ಶೋಕಜಾಲೇನ ಮಹತಾ ವಿತತೇನ ನ ರಾಜತೀಮ್|
ಸಂಸಕ್ತಾಂ ಧೂಮಜಾಲೇನ ಶಿಖಾಮಿವ ವಿಭಾವಸೋಃ||32||
ತಾಂ ಸ್ಮೃತೀಮಿವ ಸನ್ದಿಗ್ಧಾಮ್ ವೃದ್ಧಿಂ ನಿಪತಿತಾಮಿವ|
ವಿಹತಾ ಮಿವ ಚ ಶ್ರದ್ಧಾಂ ಆಶಾಂ ಪ್ರತಿಹತಾಮಿವ||33||
ಸೋಪಸರ್ಗಾಂ ಯಥಾಸಿದ್ಧಿಂ ಬುದ್ಧಿಂ ಸ ಕಲುಷಾಮಿವ|
ಅಭೂತೇನಾಪವಾದೇನ ಕೀರ್ತಿಂ ನಿಪತಿತಾಮಿವ ||34||
ರಾಮೋಪರೋಧವ್ಯಧಿತಾಂ ರಕ್ಷೋಹರಣ ಕರ್ಶಿತಾಮ್|
ಅಬಲಾಂ ಮೃಗಶಾಬಾಕ್ಷೀಂ ವೀಕ್ಷಮಾಣಾಂ ತತ ಸ್ತತಃ||35||
ಭಾಷ್ಪಾಮ್ಬುಪರಿಪೂರ್ಣೇನ ಕೃಷ್ಣವಕ್ರಾಕ್ಷಿಪಕ್ಷ್ಮಣಾ|
ವದನೇನಾಪ್ರಸನ್ನೇನ ನಿಶ್ಸ್ವಸನ್ತೀಂ ಪುನಃ ಪುನಃ||36||
ಮಲಪಙ್ಕಧರಾಂ ದೀನಾಂ ಮಣ್ಡನಾರ್ಹಾಂ ಅಮಣ್ಡಿತಾಮ್|
ಪ್ರಭಾಂ ನಕ್ಷತ್ರರಾಜಸ್ಯ ಕಾಲಮೇಘೈರಿವಾವೃತಾಮ್||37||
ತಸ್ಯ ಸಂದಿದಿಹೇ ಬುದ್ಧಿಃ ಮುಹುಃ ಸೀತಾಂ ನಿರೀಕ್ಷ್ಯತು|
ಆಮ್ನಾಯಾನಾಂ ಅಯೋಗೇನ ವಿದ್ಯಾಂ ಪ್ರಶಿಥಿಲಾಮಿವ||38||
ದುಃಖೇನ ಬುಬುಧೇ ಸೀತಾಂ ಹನುಮಾನನಲಙ್ಕೃತಾಮ್|
ಸಂಸ್ಕಾರೇಣ ಯಥಾ ಹೀನಾಂ ವಾಚಂ ಅರ್ಥಾಂತರಂ ಗತಮ್||39||
ತಾಂ ಸಮೀಕ್ಷ್ಯ ವಿಶಾಲಾಕ್ಷೀಂ ರಾಜಪುತ್ರೀಂ ಅನಿಂದಿತಾಮ್|
ತರ್ಕಯಾಮಾಸ ಸೀತೇತಿ ಕಾರಣೈರುಪಪಾದಿಭಿಃ||40||
ವೈದೇಹ್ಯಾ ಯಾನಿ ಚಾಙ್ಗೇಷು ತದಾ ರಾಮೋಽನ್ವಕೀರ್ತಯತ್|
ತಾನ್ ಆಭರಣಜಾಲಾನಿ ಗಾತ್ರಶೋಭೀನ್ಯಲಕ್ಷಯತ್||41||
ಸುಕೃತೌ ಕರ್ಣವೇಷ್ಟೌ ಚ ಶ್ವದಂಷ್ಟ್ರೌ ಚ ಸುಸಂಸ್ಥಿತೌ|
ಮಣಿವಿದ್ರುಮ ಚಿತ್ರಾಣಿ ಹಸ್ತೇಷ್ವಾಭರಣಾನಿ ಚ ||42||
ಶ್ಯಾಮಾನಿ ಚಿರಯುಕ್ತತ್ವಾತ್ ತಥಾ ಸಂಸ್ಥಾನವಂತಿ ಚ|
ತಾನ್ಯೇ ವೈತಾನಿ ಮನ್ಯೇಽಹಂ ಯಾನಿ ರಾಮೋಽನ್ವಕೀರ್ತಯತ್||43||
ತತ್ರಯಾ ನ್ಯವಹೀನಾನಿ ತಾನ್ಯಹಂ ನೋಪಲಕ್ಷಯೇ |
ಯಾನ್ಯಸ್ಯಾ ನಾವಹೀನಾನಿ ತಾನ್ ಇಮಾನಿ ನಸಂಶಯಃ||44||
ಪೀತಂ ಕನಕಪಟ್ಟಾಭಂ ಸ್ರಸ್ತಂ ತದ್ವಸನಂ ಶುಭಮ್|
ಉತ್ತರೀಯಂ ನಗಾಸಕ್ತಂ ತದಾ ದ್ರಷ್ಟುಂ ಪ್ಲವಙ್ಗಮೈಃ||45||
ಭೂಷಣಾನಿ ಚ ಮುಖ್ಯಾನಿ ದೃಷ್ಟಾನಿ ಧರಣೀ ತಲೇ|
ಅನಯೈವಾಪವಿದ್ದಾನಿ ಸ್ವನವನ್ತಿ ಮಹನ್ತಿ ಚ||46||
ಇದಂ ಚಿರಗೃಹೀತತ್ವಾತ್ ವ್ಯಸನಂ ಕ್ಲಿಷ್ಟವತ್ತರಮ್|
ತಥಾಽಪಿ ನೂನಂ ತದ್ವರ್ಣಂ ತಥಾ ಶ್ರೀಮತ್ ಯಥೇತರತ್||47||
ಇಯಂ ಕನಕವರ್ಣಾಙ್ಗೀ ರಾಮಸ್ಯ ಮಹಿಷೀ ಪ್ರಿಯಾ |
ಪ್ರಣಷ್ಟಾಽಪಿ ಸತೀ ಯಾಽಸ್ಯ ಮನಸೋ ನ ಪ್ರಣಸ್ಯತಿ||48||
ಇಯಂ ಸಾ ಯತ್ಕೃತೇ ರಾಮಶ್ಚತುರ್ಭಿಃ ಪರಿತಪ್ಯತೇ|
ಕಾರುಣ್ಯೇ ನಾನೃಶಂಸ್ಯೇನ ಶೋಕೇನ ಮದನೇನ ಚ||49||
ಸ್ತ್ರೀ ಪ್ರಣಷ್ಟೇತಿ ಕಾರುಣ್ಯಾತ್ ಆಶ್ರಿತೇತ್ಯಾನೃಶಂಸ್ಯತಃ|
ಪತ್ನೀ ನಷ್ಟೇತಿ ಶೋಕೇನ ಪ್ರಿಯೇತಿ ಮದನೇನ ಚ||50||
ಅಸ್ಯಾ ದೇವ್ಯಾ ಯಥಾ ರೂಪಂ ಅಙ್ಗಪ್ರತ್ಯಙ್ಗ ಸೌಷ್ಟವಮ್|
ರಾಮಸ್ಯ ಚ ಯಥಾರೂಪಂ ತಸ್ಯೇಯ ಮಸಿತೇಕ್ಷಣಾ||51||
ಅಸ್ಯಾ ದೇವ್ಯಾ ಮನಸ್ತಸ್ಮಿನ್ ತಸ್ಯ ಚಾಸ್ಯಾಂ ಪ್ರತಿಷ್ಟಿತಮ್|
ತೇನೇಯಂ ಸ ಚ ಧರ್ಮಾತ್ಮಾ ಮುಹೂರ್ತಮಪಿ ಜೀವತಿ||52||
ದುಷ್ಕರಂ ಕೃತವಾನ್ ರಾಮೋ ಹೀನೋಯದನಯಾ ಪ್ರಭುಃ|
ಧಾರಯ ತ್ಯಾತ್ಮನೋ ದೇಹಂ ನ ಶೋಕೇ ನಾವಸೀದತಿ||53||
ದುಷ್ಕರಂಕುರುತೇ ರಾಮೋ ಯ ಇಮಾಂ ಮತ್ತಕಾಸಿನೀಮ್|
ಸೀತಾಂ ವಿನಾ ಮಹಾಬಾಹುಃ ಮುಹೂರ್ತಮಪಿ ಜೀವತಿ||54||
ಏವಂ ಸೀತಾಂ ತದಾ ದೃಷ್ಟ್ವಾ ಹೃಷ್ಟಃ ಪವನ ಸಂಭವಃ|
ಜಗಾಮ ಮನಸಾ ರಾಮಂ ಪ್ರಶಶಂಸ ಚ ತಂ ಪ್ರಭುಮ್||55||
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ಪಂಚದಶಸ್ಸರ್ಗಃ||
||ಓಮ್ ತತ್ ಸತ್||
|| Om tat sat ||